„საქართველოს სხვადასხვა ქვეყნების წარმომადგენლები ეწვივნენ“;

„მოედანზე ბევრი ადამიანები შეკრებილიყვნენ“;

„მან უცხოეთში ათი საუკეთესო დღეები გაატარა...“ –

ეს მაგალითები სხვადასხვა მედიიდან, სოციალური ქსელიდან თუ პირადი საუბრებიდან არცთუ ისე იშვიათად მსმენია. ისინი იმ შეცდომათა ზოგადი ნიმუშია, რომლებსაც ხშირად ვუშვებთ ხოლმე, როცა საქმე მრავლობითი მნიშვნელობის გამოხატვას ეხება.

ებ-იან მრავლობითში მდგომი სულიერი და უსულო სახელების და კრებითი სახელების შესახებ უნდა გვახსოვდეს, რომ:

ა) თუკი სუბიექტი კრებითი სახელია და მის სიმრავლეს შინაარსობრივი კონტექსტი აქვს (ხალხი, ლაშქარი, ერი, ჯოგი და ა.შ.), მაშინ ზმნა მხოლობით რიცხვში შეეწყობა. მაგალითად: საზოგადოება შეიკრიბა; ლაშქარი დაიძრა (და არა საზოგადოება შეიკრიბნენ, ლაშქარი დაიძრნენ და ა.შ.)

ბ) ზმნაში სიმრავლე არ აისახება იმ შემთხვევაშიც, თუკი სუბიექტს სიმრავლის მსაზღვრელი სიტყვა (ეს შეიძლება იყოს რიცხვითი სახელი - ასი, ბევრი, უთვალავი; ნაცვალსახელი - ზოგი, ყველა და ა.შ.) უკვე თან დაერთვის. მაგალითად: სხვადასხვა საკითხი, ბევრი ადამიანი, ზოგი იდეა, ათი დღე (და არა სხვადასხვა საკითხები, ბევრი ადამიანები, ზოგი იდეები და ა.შ.)

გ) ზმნა მხოლობითში შეეწყობა იმ შემთხვევაშიც, თუ სუბიექტი ებ-იან მრავლობითში მდგომ უსულო სახელს წარმოადგენს. მაგალითად: ტყეები ფოთლებისგან განიძარცვა, სხივები მოეფინა და ა.შ.

გამონაკლისი ეხება გასულიერებულ უსულო საგანს (ძირითადად, მხატვრულ ლიტერატურაში გვხვდება) და ამ შემთხვევაში ზმნაც მრავლობითში გვაქვს. მაგალითად: მთები აბუბუნდნენ, ახმაურდნენ სამრეკლოები, ქვები ღაღადებენ და ა.შ.